Búgin О́skemende osy máselege baılanysty shuǵyl jıyn ótkizilip, jaǵdaıdyń oryn alýyna Ertis basseıni ınspeksııasynyń óz jumysyna salǵyrt qaraǵany, sý deńgeıine durys monıtorıng júrgizbegeni, úsh ese mólsherdegi sý jiberetinin jergilikti bılikke aldyn ala eskertpegeni, sonyń kesirinen júzdegen adamnyń ómirine qaýip tóngeni aıtyldy.
«Úsh kún ishinde túsiniksiz sebeptermen sý toqtaýsyz jiberilgen. Shúlbi sý qoımasynda 1 naýryzda sýdyń ortasha bosatylý kólemi sekýndyna 501 tekshe metrdi quraǵan. 20 naýryzda sý kólemi shuǵyl artyp, sekýndyna 661 tekshe metrge jetken. 25 naýryzda sekýndyna 721, 27 naýryzda sekýndyna 1127, al 28 naýryzda apatty jiberý, ıaǵnı sekýndyna 1800 tekshe metr sý jiberilgen. Bul sý qoımasynda sý jiberý júıeli túrde júrgizilmegenin kórsetedi. Sizder eshbir eskertýsiz jiberiletin sý mólsherin úsh esege asyrǵansyzdar. Jaǵdaıdy nege aldyn ala boljamaǵansyzdar?», - dedi jıynda sóz alǵan oblys ákimi Danıal Ahmetov.
Ertis basseıni ınspeksııanyń basshysy Qazymbek Baımaǵambetov 23 naýryz ben 26 naýryz aralyǵynda qar aralas jańbyr jaýyp, qoımadaǵy sý molaıyp, sý deńgeıi apatty shamaǵa jetkendikten, bógen qaýipsizdigi úshin sýdy kóptep jiberýge májbúr bolǵandyqtaryn jetkizdi. Jıynǵa qatysqan oblys prokýrory Qusaıyn Igembaev oryn alǵan jaǵdaı qazir tekserilip jatqanyn atap ótti. «7 naýryzda arnaıy jıyn ótkizip, qala men aýdan ákimderine, tıisti memlekettik organdarǵa jaǵdaıdy kúndelikti qadaǵalap, monıtorıng júrgizýdi tapsyrǵanbyz. Qazirgi ýaqytta tótenshe jaǵdaı jarııalanǵan aýdandarda da tekserý júrgizilýde», - dedi oblys prokýrory.
28 naýryz kúni túnde Ertistegi sý deńgeıi 525 santımetrge (shekti deńgeı – 450) jetipti. Túıemoınaq aralynan 192 adam qaýipsiz jerge kóshirilgen. 139 adam (onyń – 40-y bala) qonaqúıge ornalastyrylǵan.
Azamat QASYM,
«Egemen Qazaqstan»
Shyǵys Qazaqstan oblysy
